LAMKA, Jan. 26 : Tuni in India gamsung mun chih ah, a 63 vei na, Indian Republic Day thupi tak in zat in om a, Lamka ah leng Public Ground ah zat in om hi. Hiai hun ah, Ms. Jacintha Lazarus, IAS, Deputy Commissioner, Churachandpur in Chief Guest hihna toh uap in, India Flag kaihpalh na nei in, salute lak na nei hi. Programme hun sung in parade contengent 24 ten parade kidemna nei ua, Saidan Cultural Troupe in namlam lahna nei in, HM English School in bamboo dance lahna nei ua, JNV, Kendra Vidalaya, BSF leh NCC ten item tuam tuam lahna leng nei uhi.

Hiai hun a Chief Guest, Ms. Jacintha Lazarus, IAS, Deputy Commissioner, Churachandpur in a thugenna ah, kum dang teng sang mah ah, tukum a Republic day i lop pen uh, ei te a ding a hun hoih ahi chi a gen in, Republic day i zat utoh kiton a, mipi'n i gam vaihawm ding a i deih pen uh i vote ding uh ahi chi in gen hi. Huai ban ah, i gam uh a etlawm na te, mimal kuapeuh in i kepbit ding uh ahi chi a gen in, hiai natural beauty te, Pathian thil bawl ahi chi in gen hi.

DC in a gen zel na ah, society khat peuh, a khantouh na ding toh kisai, tuailai te khut ah kinga ahi chi in gen a, mailam hun ding toh kisai leh khantouh na ding toh kisai tuailai te khut a kinga ahi chi in gen hi. Khotang sung ah tuailai khenkhat ten nuam tak a sum muh ut ua, ban ah, mi tamtak te khamtheih guih theih a kibual ahih na uah, hiai ten, i gam uh melsia sak uh ahi chi a gen in, hiai bang a khamtheih guihtheih doudal na ding a Society tuam tuam leh church leader ten pannasa taka a lak uh a deih thu gen hi.

Gam sung a tuailai kichi ten talent hoih tak tak nei a, upa te sang a zat theih zaw ahihna uah, amau te hoih tak a i kep touh ding uh ahi chi a gen in, hiai Republic Day in Churachandpur district sung a om kuapueh tung ah khamuan na, lemna leh ki tanau sem na a tut a deih thu gen hi.

Parade kidemna toh kisai, category 3, Pasal, Numei leh NCC a khen in om a, Pasal Category ah, JNV Senior Boys in khatna la in, Donbosco Higher Secondary School leh Phungkhothang High School ten, 2nd leh 3rd la uhi. Numei ah, GM Model High School in 1na la in, Rengkai Government Higher Secondary leh Donbosco Higher Secondary ten 2nd le 3rd la uhi. NCC category ah Rayburn NCC Senior Division in 1st la in, Rayburn NCC Senior Wing leh Bethany Christian College Junior Wing ten 2nd le 3rd la uhi. Tutung in ahihleh kum dang a mah bang in award/certificate tuam tuam hawm in om a, himahleh kum dang a zah a tam bel kihawm lou hi.

Read : 23 times