LAMKA, Jan. 30 : Apaisa January 28, 2012, Vote khiak ni a, New Lamka JB School a thiltung tawh kisai, Trinamool Congress Candidate, P.Songlianlal in zan in Press te kimuhpih in, thil om dan hilhchetna bawl hi.

Hiai hun a, Candidate pu'n a gen dan in, New Lamka JB school kia hilou in, polling station tamtak ah, Congress worker ten, Trinamool Congress a vote khe ding tamtak te khesak lou leh lutsak louh in koih ua, banah, mi khenkhat te tanpha a khut uh lehhen som in mai tuam hial uh chi in gen hi. Huai banah, Congress Badge belh a polling station sung a kivei a, mi te vau bawl a, Congress mun a vote khiak ding chih tanpha a sawl uh ahihdan gen hi.

P. Songlianlal in a gen zel na ah, Congress worker khenkhat te, polling booth sung ah lut in, mi vote khiak lai en in, Congress lou a khe ding teng vau bawl uh chih tanpha in gen hi. New Lamka JB School a thil tung toh kisai ahihleh, Lim latu pen in, congress mi le sa te lim te la dan in om mah leh la lou a, a lem ching mai mai ahihdan a theih phet a, a mun va delh ahihdan gen hi. Huai banah, polling booth sung lut in, huai ah, a sung a tu, polling personnel leh a tuam tuam te, identity card te check abawl na lam ah, lim latu pan, identity card tanpha neilou ahihdan mukhia a, ban ah, un-authorised photographer ahih dan thei khia ahihdan gen in leh, hiaibang a a kihou lai ua, ama worker te khat in, a camera pen a lak sak ahihdan gen in, amau custody ah koih ua, himahleh, District Election Officer in ngetna a bawl taka, pekiik ngal ahihdan gen a, hiai toh kisai a thubuai bangmah omlou ahihdan leng gen hi.

Read : 30 times