LAMKA, Jan. 30 : Manipur ah January 28, 2012 in 10th MLA election neih in om a, Churachandpur district a te Polling officer ban ah, EVM te a tung kim nai louh ziak in overall percentage gen theih nai louh hi.

Town area sung a EVM te bel ani mah in DC office strong room ah koih in om ngal a, himahleh mun gamla deuh, a diak in Jiribam area, Thanlon Area leh Henglep area a mun khenkhat te helicopter zang in zan apan in kinawn uhi. Mun tamtak a EVM leh Polling personnel te helicopter in vapi a, tuni a nawn gai vek ding chih himahleh, a lenna pen uh cancelled ziakin polling station 3 a EVM tung thei nai lou hi.

Churachandpur district sung a constituency 6 lak ah, 55-Tipaimukh AC leh 56-Thanlon AC a te vote percent gen theih nai louh a, himahleh, Constituency dang te a bel theih in om ta hi. 57-Henglep AC ah voter 26592 om lak ah vote 16588 kikhia a, a percent in 78.29% tungzou hi. 58 CCpur AC ah, vote 46276 lak ah 29795 kikhia in 64.39% tung hi. 59 Saikot AC ah Vote 44,843 lak ah 30,060 kikhia in 67.03 tung zou a, 60 Singngat AC ah Voter 23388 lak ah 15657 kikhia in, 66.94% tung zou hi.

Vote khiak dan toh kisai, tunitak lam a, DEO makaih a, Observer te banah, Sector Magistrate ten meeting nei a etchet na nei lel ahihna uah, polling station bangzah ah repoll ngai ding hiam chih bel chiang nai lou a, himahleh, polling station 3, 55-Tipaimukh ah 55/1 Chingmun leh 55/29 Senvon B ban ah, 57/Henglep ah 57/36 Phouljang te ah repoll om ding a, adang repoll na ding mun bel theih beh om nai tadih lou hi.

Read : 20 times