LAMKA, Jan. 31 : 10th Manipur Legislative Assembly Election neih na hun ah, Churachandpur district sung ah security tuam tuam company 40 kizang hi. Election toh kisai zoh siang hinai chiah kei mahleh, security company 14 in Lamka nuse nawn ta uhi.

Hiai toh kisai a police lam apan thu kiza dan in, Security company a kiikte Mizoram Armed Police/IRB company 6, Assam Armed Police/IRB company 3 leh CRPF company 5 hi ua, ban ah, Mizoram Armed Police/IRB te ahih leh Uttar Pradesh a election duty ding a kuan suak ngal ding uh hidan in leng gen uhi.

MLA Election toh kisai vote khiak zoh ahihtoh kiton in, vote khiakna ding a kizang van tuam tuam, a diak in EVM te DC office tungkim ta in, strong room ah koih in om ta hi. Vote sim hun ding, March 6 pek ahihna ah, DC office a strong room guard tu ding in CRPF te zat in om ua, banah, hiai strong room kiim le kiang ah siik dai khung in, zan hun in current paisak sek uhi.

Election toh kisai, Churachandpur district sung ah a vek a kigawm in polling booth 279 kizang a, zan nitak a EVM teng a tun kim nung in observer te ban ah, polling officer ten etchet na nei in, repoll omna ding mun tuam tuam genkhawm na nei uhi. Hiai toh kisai a DC office lam apan thu kiza dan in, 55-Tipaimukh AC sung ah polling station 2, 55/1 Chingmun, leh 55/29 Senvon B te repoll ding in confirm hi a, ban ah, 56-Thanlon AC a, 56/3 Savaipaih, leh 56/8 Phaipheng, ban ah, 57-Henglep ah 57/36 Phuoljang repoll hiding chi in gen uhi.

Repoll ding toh kisai ahileh tuni tak lam a DC leh Election commission of India lam te kihou na dungzui in, a hongtung ding February 4, 2012 in hiai polling station 5 te ah repoll hiding chi in gen uhi.

Tutung election vote khiak na hun ah, Churachandpur district sung pumpi a vote kikhia a percent a et in, 60.95% kia tungzou hi.

Read : 22 times