IMPHAL, Oct. 27 : Senapati a Mini secretariat enkhia a kuan Works Minister K Ranjit Singh leh a team te  Imphal zuan a kik lam, Kangpokpi ah numei pawl in ana kham in, minister pa toh kihou ut chi in hun ana ngen uhi. Minister pa utlou in District Administration a senior officer khat toh kihou sak sawm mah leh numei pawl te utlou uh a, a tawp in minister pa in nupi pawl pali mi 3 kimuhpih hi.

Nupi pawl in Minister pa kiangah Kangpokpi a ADC office building bawlzawh a om pen enkhia a akin thei lam a a honna neih ding banah, Districthood demand a nei uh toh kisai in minister pa in ngai poimoh a, state assembly election ma ngei a Sadar Hills district full fledge district a puankhiak ahih theih na dia panpih a ngaihtuah pih ding chi'n ngetna bawl uhi.

Sadar Hills District toh kisiai in Minister pa in assurance a piak ngam louh banah, ama thu kia a pai theilou, Cabinet thupukna ngai ahi chin gen in, Kangpokpi ADC building honna toh kisai blockade ziak a sepsuah theihlouh a, mipi ten a honna a deih ua leh honna neih theih ahi chi'n gen hi.

Nupi pawl toh a kihou zoh un, Minister pa leh a team te nungkik in Kangpokpi leibul ah ding uh a, huai apan Imphal lam apan Commando te amah pi dingin thukhak hi. Imphal apan Command te gari 35 zang in SSP Imphal West police makaih in personal 210 kuan in, teargas leh blank fire bawl in mipi omte hawldalh in Minister pa Imphal tut uhi.

Minister pa Imphal a tun in a tuanna bulletproof gari glass sia police in enchian in thau a kap hinei ahi chi'n gen uhi. Huchibang kal ah nupi khat, a phei thau a kap khak a om in, BRTF te truck a dim a tyre pua halsak in om hi.

Read : 142 times