IMPHAL, Nov. 30 : Tuni zinglam dak 11:00 vel in, Imphal, Hapta Kangjeibung, a Sangai Festival zatna mun kong ah bomb hat tak khat puak in mi 1 si in midang bangzah hiam in liamna tuak uhi.

Bomb puah na mun ahihleh, a hongtung ding December 3, 2011 a Indian Prime Minister Dr. Manmohan Singh in a hon ding, City Convention Centre apan metre 50 lel a gamla ahi chi in thusuak in taklang hi.

Thusuak in a taklat zel dan in, hiai bomb ahihleh, Sangai Festival kizatna mun lutna ding gate kiang a ki park, rickshaw apan hi a, KCP helpawl hi ding a muanmoh pawl khat in, a bomb te, Rs. 20 loh ding a rickshaw a apuak sak uh hidan in rickshaw neitu, Kora in gen hi.

Bomb puak ziak in, rickshaw neitupa bel, si lou in liam lel a, himahleh, a kiang nai a om midang 1 a sih banah, a dang 2 in leng liamna tuak uhi. Liamna tuak te kintak in RIMS damdawi inn ah puak tun a om in etkol in om ngal uhi.

Bomb puah zoh phet in, security force lam in a mun delh pha in, thil omdan kansui na nei ua, banah, bomb puah na mun ah, a puak nai lou, bomb dang khat leng mukhia uh ahihdan taklang uhi.

Thusuak in a taklat zel dan in, bomb puak toh kisai, kua te sulnung hiam chih theih hikei mah leh, KCP helpawl te ahih ngei uh a ginthu gen ua, banah, hiai bomb puak in, tunung a Indian Prime Minsiter in Manipur a hong phak na ding toh kisai a, security khauh sak tuan mah mah ding ahihdan taklang hi.

Prime Minister, Dr. Manmohan Singh in Manipur a hong phak hun in, UPA Chairperson, Sonia Gandhi in leng hong zui ding hi.

Read : 49 times